Aigua e salut

Era Val d’Aran aufrís ua experiéncia unica ath visitant arderós de suenhar eth còs e era ment. Immergir-se enes aigües sulfuroses coma ja heren es Romans, retrobar-se damb un madeish en plea natura, suenhar era salut o simplament relaxar-se e desbrembar-se deth rambalh dera vida vidanta son allicients que captiven a quinsevolh viatgèr.

Istòria e salut confluissen enes balnearis aranesi, quauqui uns dejà documentadi en temps der Empèri Roman. Es aigües captades a ua prigondor superiora a 300 m. ragen generosament a mès de 30°C entà aufrir es sues proprietats mineromedicinaus, avantatjoses entath tractament des afeccions des uassi e dera pèth, entath sistèma circulatòri e es vies respiratòries. Es equipaments de prumèra qualitat desvolopadi ath torn des gotilhs an autrejat prestigi internacionau a quauqui uns d'eri, coma es Termas de la Baronia ena poblacion de Les o Es Banhs de Tredòs ena ribèra d’Aiguamòg, laguens era periferia deth Parc Nacionau d’Aigüestòrtes i Estany de Sant Maurici, que, plaçat a 1.740 m., ei eth balneari mès naut d'Euròpa.

Es aigües termaus se pòden utilizar de fòrça manères: a trauès de suenhs idroponics, per inalacion, coma banh o coma ua aplicacion independenta, en combinacion damb d'auti mineraus. Tanben per aguestes caracteristiques, es balnearis pòden èster consideradi coma centres de medecina naturau en toti es aspèctes.

Ena Val d'Aran, trobaràs:

• Aigües sulfurades

• vaporarium

• sauna

• sala de marbre templat

• hònt de gèu

• jacuzzis collectius a temperatura variabla

• pediluvi

• pista de reflexologia podal

• piscina termau interiora e exteriora